ჩვენ გვყავს 124 სტუმარი და წევრები არ არის საიტზე
ლანჩხუთისა და ხაშურის მუნიციპალიტეტების მოქალაქეთა გზამკვლევები
საქართველოს მოქალაქეები ადგილობრივი მნიშვნელობის საქმეებს აწესრიგებენ ადგილობრივი თვითმმართველობის მეშვეობით, საქართველოს კანონმდებლობის შესაბამისად (საქართველოს კონსტიტუცია, მუხლი 7). ადგილობრივი თვითმმართველობის კოდექსის თანახმად კი, ადგილობრივი თვითმმართველობა არის საქართველოს მოქალაქეთა უფლება და შესაძლებლობა, ადგილობრივი თვითმმართველობის ორგანოების მეშვეობით, საქართველოს კანონმდებლობის ფარგლებში, ადგილობრივი მოსახლეობის ინტერესების შესაბამისად გადაწყვიტონ ადგილობრივი მნიშვნელობის საკითხები (მუხლი 2). ამდენად, კანონმდებლობით თითოეულ მოქალაქეს აქვს უფლება და შესაძლებლობა, ჩაერთოს მისი ქალაქის, დაბის, თემის, სოფლისა თუ უბნისთვის მნიშვნელოვანი საკითხების გადაწყვეტის პროცესში და მის მიერ არჩეული ადგილობრივი ხელისუფლებისგან მოითხოვოს პრობლემების მოგვარება და მუნიციპალური მომსახურებების მიწოდება.
უფლებამოსილების შესრულებისთვის ერთ-ერთი მთავარი ინსტრუმენტი ადგილობრივი ბიუჯეტია. თვითმმართველი ერთეულის ხელისუფლება, ადგილობრივი მოსახლეობის საჭიროებების გათვალისწინებით, დამოუკიდებლად იღებს გადაწყვეტილებას ადგილობრივი ბიუჯეტის ხარჯვაზე.
იმისათვის, რომ მოქალაქე აქტიურად ჩაერთოს გადაწყვეტილების მიღების პროცესში, უნდა იცოდეს:
- როგორია საბიუჯეტო პროცესი?
- რა როლი აქვთ მოქალაქეებს ადგილობრივი ბიუჯეტის ფორმირებისა და განკარგვის პროცესში?
- რამდენია მუნიციპალიტეტის ბიუჯეტი?
რა პროექტების განხორციელებაზე შეიძლება დაიხარჯოს ადგილობრივი ფინანსური რესურსები?
შემუშავებული გზამკვლევების მიზანია, სწორედ ამ კითხვებზე პასუხის გაცემაში დაეხმაროს მოქალაქეს, გააცნოს მუნიციპალიტეტის ფინანსური შესაძლებლობები და ადგილობრივი ხელისუფლების მიერ დაგეგმილი კეთილდღეობის მომსახურების პროგრამები.
გზამკვლევებში მოცემულია ლანჩხუთისა და ხაშურის მუნიციპალიტეტების 2025 წლის ბიუჯეტების ძირითადი ფინანსური პარამეტრები, პროგრამებისა და ქვეპროგრამების შესახებ ინფორმაცია, სხვადასხვა სოციალური დახმარების დეტალური აღწერა, პროგრამების ბენეფიციარები და მათთვის გათვალისწინებული დაფინანსების ოდენობა. ამასთან, დოკუმენტში წარმოდგენილია საბიუჯეტო პროცესი და ბიუჯეტის ეტაპები, რაც დაეხმარება მოქალაქეს დროულად ჩაერთოს მომავალი წლის ბიუჯეტის პროექტზე მუშაობის პროცესში და წარადგინოს თავისი წინადადებები.
გადმოწერეთ: